چيف سيڪريٽري چيو آهي ته اسپتالن ۽ آر او پلانٽن ۾ ڪوتاهي ڪندڙ آفيسرن کي بخش نه ڪيو ويندو چيف سيڪريٽري سنڌ ممتاز شاهه پاران ٿرڪول منصوبي سميت ٿر جي مختلف اسپتالن، اسڪولن جا دورا ڪري ڏڪار واري صورتحال جو جائزو ورتو چيف سيڪريٽري دوري دوران ٿر جي اسپتالن ۾ ڊاڪٽرن جي کوٽ کي ختم ڪرڻ لاءِ فوري طور نوان ڊاڪٽر ڀرتي ڪرڻ ۽ ٿر ۾ ڪراچي ۽ حيدرآباد جا اسپيشلسٽ ڊاڪٽر موڪلڻ جون ھدايتون ڪيون ان موقعي تي ڳالهائيندي چيف سيڪريٽري سنڌ ممتاز شاهه چيو ته نيوٽريشن سپورٽ پروگرام کي ناڪام بڻائيندڙ آفيسرن جي خلاف سخت ايڪشن کنيو ويندو، حڪومت جا ڪروڙين روپيا آفيسرن جي نا اهلي سبب ضايع ٿي رهيا آهن ممتاز شاهه چيو ته آفيسرن جي نا اهلي جي ڪري ٿر صورتحال جو سڄو ملبو سنڌ حڪومت تي ڪري پيو، اهڙن آفيسرن کي هاڻي پوسٽن تي نه رهڻ ڏنو ويندو هن چيو ته ٿرپارڪر جي اسپتالن ۾ ڊاڪٽرن جي کوٽ سميت ٻيا مسئلا موجود آهن، جن کي حل ڪيو ويندو، اسپتالن ۾ مشينري ۽ ٻيا گهربل اوزار به فراهم ڪيا ويندا چيف سيڪريٽري چيو ته ٿرڪول منصوبي جي نوڪرين ۾ مقامي ماڻهن کي ترجيح ڏني وڃي، ته جيئن ٿر ۾ بيروزگاري ختم ٿي سگهي، اينگرو ڪمپني پاران قائم ڪيل ٿر فائونڊيشن رڳو اسلام ڪوٽ نه پر سڄي ضلعي ۾ اسپتالون ٺاهي ۽ ٻيا سماجي ڪم ڪري.
